Арассыыйаҕа бибилэтиэкэ күнэ!
Ыам ыйын 27 күнэ — Арассыыйаҕа бибилэтиэкэ күнэ, Бэрэсидьиэн Борис Ельцин ыйааҕынан 1995 сыллаахтан бэлиэтэнэр. 1795 сыллаахха бу күн Импэрээтэр аһаҕас бибилэтиэкэтэ олохтоммут эбит.
Хайахсыт бибилэтиэкэтин устуоруйата
1963с. СР культуратын үтүөлээх үлэһитэ Татьяна Андреевна Жараева, оройуоннааҕы библиотека сэбиэдиссэйэ Аманатова Мария Петровналыын Пушкин аатынан республикатааҕы библиотека дублетнай фондатыттан 160 кинигэни ылан уонна Чурапчы оройуоннай библиотекатыттан эбинэн “Кырыс” ыччат ферматыгар общественнай библиотека аспыттар, иккис инник библиотеканы Хайахсыкка “Сэмэн үрэҕэ” ферматыгар олохтообуттар.
Хайахсыт библиотекатыгар араас сылларга үлэлээбиттэрэ: 1964 сыллаахха Матрена Ионовна Жиркова библиотекарь идэтин баһылаан, Хайахсыт библиотекатыгар анан үлэлии кэлбитэ. Түөрт сыл устата кини үлэтин үтүө суобастаахтык үлэлээбитэ. 1970 сылтан салгыы Дьячковская Елена Прокопьевна, онтон Маркова Е.С. 1976-1977сс үлэлээбиттэрэ, 1978 сыллахтан Ефремова Мария Ильинична өр кэмҥэ үлэлээбитэ. 1983-1986сс Марина Ивановна Кондратьева, 1987-1989 сылларга Поисеева Анастасия Ионовна үлэлээбиттэрэ. Кинилэр кэннилэриттэн кылгас кэмнэргэ Конникова Варвара Гаврильевна, Егасова Дария Пантелеймоновна үлэлээбиттэрэ. Сыллар ааһан истэхтэрин ахсын, библиотека үлэтэ сайдан, саҥа таһымҥа тахсан испитэ. 1990с Кузьмина Марфа Николаевна Кемеровтааҕы Культура институтун библиотечнай факультетын бүтэрэн баран Чурапчы оройуонугар ананан үлэлии кэлбитэ. Хайахсыт библиотекатыгар 1992-2004 сылларга библиотеканы салайан, олус таһаарыылаахтык үлэлээбитэ. Кини кэнниттэн 2004-2008 уонна 2011-2014сс Егорова Анастасия Семеновна, 2008-2011сс Кузьмина Изабелла Степановна Хайахсыт библиотекатын сайдыытыгар үлэлээн, ааҕааччылары кинигэҕэ тардыбыттара.
Өр сылларга үлэлээн ааспыт библиотекарьдар
Матрена Ионовна Жиркова
Мария Ильинична Ефремова
Марфа Николаевна Кузьмина
Анастасия Семеновна Егорова
БИЛИИ КЫҺАТА — БИБЛИОТЕКА
Чуумпуга тыыннаах кэпсээннэр,
Ааптардар куттара олохсуйбут.
Билии килбиэн дьиэтэ – Бибилиэтикэ,
Сырдыкка сирдиир үтүө аартык.
Хас биирдии илиискэ — олох,
Хас биирдии сурукка — билии.
Өбүгэ үһүйээнэ, номоҕо
Манна баар — хараллар.
Аартык арыллар ааспыттан,
Билии кыһата-бу дьиэттэн..
Кинигэ тиһигэ кэккэлээн,
Ааҕааччы санаатын Сырдата байытар.
Сырдыкка, кэрэҕэ сирдиир,
Хас биирдии тыл кута иҥмит.
Кинигэни — үйэлээх баайбытын
Ааҕыҥ, сайдыҥ,билсиҥ
Билии кыһата бибилэтиэкэ
Аана мэлдьи аһаҕас!
Л.Пономарева
Күндү ааҕааччыларбыт, доҕотторбут Хайахсыт олохтоох библиотекатын аана өрүүтүн аһаҕас, саҥаттан-саҥа кинигэлэр, сурунааллар эһигини мэлдьи күүтэллэр. Кэлин, сылдьыҥ, ааҕыҥ — кинигэ алыптаах эйгэтэ эһигини күүтэр!
