Кэлэр 2026 сыл УОТ КЫҺЫЛ АТ сыла
Уот кыһыл ат кытай гороскуобугар сэттис кыыл буолар — кини көҥүлү, эрчими, инники күөҥҥэ буолары ордорор.
Ат – көҥүл, түргэн, сылайбат-элэйбэт буолуу, саҥаны-сонуну көрдөөһүн уонна дьулуур бэлиэтэ. Кини дьону-сэргэни кытта алтыһарын, болҕомто киинигэр буоларын сөбүлүүр уонна хааччаҕы тулуйбат.
Уот күүһэ – иэйии, сырдык, баһылааһын-көһүтүү, дьулуур күүһэ. Уот кыымынан сылдьыбат, эбэтэр чаҕылыччы умайар, эбэтэр уостар.
Бу икки күүс холбоһон, икки бүк күүстээх сылы үөскэтэллэр.
Ол аата, 2026 сыл көннөрү көхтөөх эрэ буолбакка, чахчы уот чаҕылыччы буолуоҕа. Бу кэмҥэ түгэннэр харах да сөп буолбатын курдук түргэнник солбуйсуохтара, оттон намыын, уу-чуумпу олох кэнники күөҥҥэ тахсыа.
Алаһа дьиэбитигэр дьол-соргу, уйгу-быйаҥ тосхойорун туһугар кэлэр сылы хайдах көрсөбүт?
Өрө көрөн турар ат фигураларынан киэргэттэххэ ситиһии эҥээрдэһиэ.
Дьиэ ис барааныгар уонна дьуолка киэргэлигэр биллэн турар кытархай, кыһыл көмүс, фиолетовай дьүһүннэри дьүөрэлиир ордук.
Саҥа сылы көрсөргө чүмэчи уматыахха сөп, эрээри уоттан-күөстэн сэрэхтээх буолар умнуллубат, ол иһин батареянан барар чүмэчи араас уота бастыҥ киэргэл буолуо.
Чугас дьоҥҥутугар мээнэ малы-салы буолбакка тыйаатырга, айаҥҥа билиэт, фитнес абонемена уо.д.а. бэлэх оҥорор ордук. Тоҕо диэтэр ат биир сиргэ олорбот — көҥүлү сөбүлүүр кыыл.
2026 сыл үгүс элбэх бэлиэ түгэннэри кэрэһэлиир. Саҥа дьылы көрсө ол-бу наадата суох бөхтөн-сахтан дьиэни ыраастыыр оруннаах.
Алаһа дьиэҕитин кылбаччы сууйан-сотон, саҥа штора иилэн, бэл ыскаадаргытын уларыттаххытына кэлэр сылга ситиһии сиэттиһиэ.
Саамай сүрүнэ — саҥа дьылы үчүгэй настырыанньалаах көрсүллүөхтээх — этэргэ диэри кини бүттүүн кэлэр сылы быһаарар буолар.
Тугу кэтэбит? Үөһээ этиллибитин курдук, уот кыһыл ат сылын кытархай дьүһүннээх таҥастаах көрсөр оруннаах — кытархай, сырдык саарыл, терракот, кыһыл көмүс, оруосабай. Онтон аһары чаҕылхай өҥү кэппэт дьон хоҥор, изумруд от күөҕэ уонна бу эргин дьүһүннээх таҥаһы кэтиэххитин сөп. Кыһыл, кыһыл-көмүс араас килэбэчигэс таастаах киэргэл уобараһы ситэрэн биэриэ. Халлаан күөх, сиэрэй өҥнөрү тумнар ордук, тоҕо диэтэр уот кыһыл ат энергията «умуллан» хаалыан сөп.
Тугу аҺыыбыт? Саҥа дьыллааҕы остуолга убаһа этиттэн аккаастаныҥ. Ол оннугар элбэх оҕуруот астаах (бэйэ киэнэ биһирэнэр), фрукталаах уонна балык эттээх остуол кэлэр сылга уйгуну-быйаҥы аҕалыа.
Сүрүнэ барыта бэйэтэ табыллыа диэн баран олорор нэс дьону бу сыл хаһаайката — уот кыһыл ат сөбүлээбэт, ол иһин бэйэҕит эмиэ сыал-сорук туруоран эрэллээхтик хардыылыыргыт ирдэнэр. Онон кэлэр сыл уларыйыылары түргэнник ылынар эрчимнээх дьоҥҥо дьолу тосхойуо.
Саҥа сыл кэлэрэ аҕыйах хонук хаалла — бу кылгас кэм иһигэр санааны сааһыланан, ситэриэхтээҕи ситэрэн кэлэр 2026 сылы үөрэ-көтө көрсөргүтүгэр баҕарабыт! Кэлэн иһэр саҥа дьылынан, саҥа дьолунан!
