Аркадий Максимович Дорофеев — Улдьаа Харалы 75 сааһа
Аркадий Максимович Дорофеев Чурапчы оройуонун Хайахсыт нэһилиэгин ытык-мааны ыалыгар Елена Константиновна, Максим Дмитриевич Дорофеевтарга олунньу 18 күнүгэр 1951 с. төрөөбүтэ. 1974с. Саха государственнай университетын бүтэрэн, Үөһээ Булуу, Таатта, Амма, Чурапчы улуустарыгар учууталынан, оскуола директорынан 43 сыл үлэлээбитэ, РФ үөрэҕириитин бочуоттаах үлэһитэ.
Аркадий Максимович оскуолаҕа үөрэнэр сылларыгар оскуола “Ыллык” хаһыат художднига этэ. Хоһооннору, кыра кэпсээннэри суруйан таһаараллара. Аркадий Максимович итинтэн төрүөттэнэн суруйар, айар үлэҕэ улам ылларан барбыта. Улуустааҕы хаһыакка араас темаҕа ыстатыйалары суруйар буолбута. Айар үлэҕэ холонон Аркадий Дорофеев- Улдьаа Харалы бастакы боччумнаах «Өлүү быата» диэн сэһэнэ 1994 с. «Саҥа олох» хаһыакка тахсыбыта. Ити сылтан прозанан утумнаахтык дьарыктанан биэс сэһэни, уонтан тахса кэпсээни уонна элбэх тэттик кэпсээннэри суруйбута. Чурапчы айар түмсүү таһаарыытыгар «Кыракый кэпсээннэр» 1996 с. бэчээттэнэн тахсыбыта. Бастаан икки сэһэнин уонна кэпсээннэрин «Чолбон» сурунаалга бэчээттэппитэ. 2002с. “Бүтүн оҥоруулаах дьон” диэн бастакы кинигэтэ Чурапчыга, 2005с. “Күүтүллүбэтэх көрсүһүү”, 2008с. “Иитиэх уол” диэн кинигэлэрэ “Бичик” кинигэ кыһатыгар тахсыбыттара.
Саха сирин ааҕааччыларыгар киэҥ сэҥээриини ылан, 2012с. олунньу 24 күнүгэр Москва куоракка Аркадий Максимович Дорофеев Россия Суруйааччыларын союһугар чилиэнинэн киирэрэ бигэргэнэр. Улдьаа Харалы суруйуулара ааҕааччыга өйдөнүмтүөлэринэн, уус-уран тылынан умсугаталларынан уратылаахтарынан ааҕааччы сэҥээриитин ылаллар.
